चरिकोट/दोलखाको विगू गाउँपालिका वडा नं. ८ मा निर्माण भएकाे साँघु खोला जलविद्युत आयोजनाले परीक्षण उत्पादन थालेको छ ।
हिमपर्वत हाइड्रोपावर लिमिटेडले निर्माण गरिरहेको २ जलविद्युत आयोजना मध्ये पहिलो चरणमा ५.५ मेगावाटको साँघु खोला १ जलविद्युत आयोजनाको शुक्रबारदेखि परीक्षण उत्पादन थालेकाे हाे ।
अहिले नेपाल विद्युत प्राधिकरणबाट आएका प्राविधिक टोलीले एक हप्तादेखि विद्युत गृह,सबस्टेसन र प्रशारण लाइनको विभिन्न उपकरणको परीक्षण सफल भएपछि उत्पादन सुरू गरेको आयोजनाको प्रबर्द्धक हिमपर्वत हाइड्रोपावर लिमिटेडका अध्यक्ष हिमाल गुरुङले जानकारी दिनुभयो । परीक्षण सफल भएकाले १५ दिनसम्म नेपाल विद्युत प्राधिकरणलाई निशुल्क विद्युत उत्पादन गरेपछि व्यवसायिक उत्पादन थाल्ने बताउनुभयो ।
साविक आलम्पू गाविस र चिलंखा गाविसको बीच भएर बग्ने साँघु खोला र चिलंखातिरबाट आउने स्याँखू खोलाको दोभानभन्दा ३ सय मिटर माथि बाँध बाँधेर पानी फर्काएर पेगू दोभानमा खसाली ५.५ मेगावाट विद्युत उत्पादन गर्ने गरी एउटा आयोजना निर्माण गरिएको छ । सो आयोजनाको बाँधमा स्याखु खोलाको पानी समेत फर्काएर मिसाउने योजना छ ।
सो आयोजनाको १४९ मिटर ग्रस हेड रहेको छ भने पेनस्टक पाइप २ हजार ३१२ मिटर मध्ये पाइप जडान गरेको छ । विद्युत प्रसारणका लागि पेगू दोभानदेखि सोरुङ खोलासम्म १३२ केभी स्वीच्याडसम्म ३३ केभी डबल सर्किट प्रसारण लाइन निर्माण गरेको छ ।
एक महिनामा अर्को २० मेगावाट विद्युत थपिने
हिमपर्वतले नै निर्माण गरिरहेको २० मेगावाटको अर्को आयोजनाबाट एक महिनापछि विद्युत उत्पादन गर्ने लक्ष्य राखेको छ । पेगू दोभानमा विद्युत गृहबाट निस्केको पानीलाई सोझै पेनस्टकबाटै २० मेगावाटको साँघु खोला जलविद्युत आयोजनाको हेडपोनमा हालिएको छ । साँघु खोला र पेगू खोलाको दोभानमा पेगू खोलाको पानीलाई समेत बाँध निर्माण गरी फर्काएर बालुवा थिग्रयाउने पोखरीबाट बनाएर दुवै खोलाको पानी मिसाएर पेनस्टक पाइपबाट सोरुङ खोलामा ल्याएर विद्युत उत्पादन हुने छ । आयोजनाको ग्रस हेड ३७३ मिटर रहेको छ ।
२० मेगावाटको आयोजनाको सिभिल, प्रसारण लाइन र विद्युत गृहको सबै काम पूरा भएका छन् । पेनस्टक पाइप जडान पूरा गरी त्यसको प्रेसर परीक्षणको काम भइरहेको अध्यक्ष गुरुङले बताउनुभयो। पाइप जडानको काम र विद्युत गृहको सामान्य काम एक महिनामा पूरा गरी विद्युत उत्पादन सुरु गर्ने लक्ष्यका साथ काम भइरहेको छ ।
यो आयोजनाको ५ हजार ८१० मिटर पेनस्टकपाइप जडान गर्नु पर्छ । सोरुङ खोलामा विद्युत गृह निर्माण भएको छ । विगू गाउँपालिका वडा नं. ८ मा हाल निर्माणाधिन ३ वटै आयोजनाको विद्युत जोड्न मिल्ने गरी स्वीच्याड निर्माण भएकाे छ । यहाँ भविष्यमा निर्माण हुने जलविद्युत आयोजनाहरुलाई समेत लक्षित गरी स्वीच्याड निर्माण गरेर १३२ केभी प्रसारण लाइनमार्फत नेपाल विद्युत प्राधिकरणको ८ किमी टाढा रहेको सिंगटी सवस्टेशनमा जोडिएको छ । सोरुङ खोलादेखि सिंगटीसम्मको १३२ केभीको २५ वटा टावर निर्माण भएका छन् ।
दुवै आयोजनाको निर्माण व्यवसायी सिभिलत तर्फ मस्तिङ हिमाली जेभी, इलेक्ट्रोमेकानिकलमा फ्लोबेल इनर्जी प्रालि भारत, हाइड्रोमेकानकलमा डाउन हाइड्रो मस्तिङ जेभी र प्रसारण लाइनमा सम्प्रधा ट्रेडिङ प्रालि रहेका छन् ।
हिपर्वतले निर्माण गरिरहेको २० मेगावाटका आयोजनाको लागत ३ अर्ब ९० करोड रहेको छ भने ५.५ मेगावाटको आयोजनाका लागि १ अर्ब ५ करोड लागत अनुमान गरिएको छ । दुवै आयोजनामा सिटिजन्स बैंकको नेतृत्वमा हिमालयन बैंक र माछापुछ्रे बैंकले ऋण लगानी गरेका छन् । ऋण र स्वपूजी लगानी ६५:३५ को अनुपातमा छ । हिमपर्ततका यि आयोजनामा अवसर इक्वीटी डाइभर्सीफाइड फण्डले ३९ करोड स्वपूजी लगानी गरेको छ ।
हिमपर्वत हाइड्रोपावरले ४२ करोड रुपैयाँ बराबरको ४२ लाख कित्ता साधारण सेयर (आईपीओ) निष्कासनको प्रक्रिया अघि बढाएको छ । जसका लागि कम्पनीले सिबिआई एल क्यापिटल लिमिटेडलाई बिक्री प्रबन्धक चयन गरेको छ ।
सम्झौता अनुसार आयोजना प्रभावित स्थानीय र सर्वसाधारण गरी जम्मा ५९ लाख कित्ता साधारण सेयर निष्कासन गर्नेछ । दुवै आयोजनाबाट वार्षिक १४९ गिगावाट आवर विद्युत उत्पादन गर्ने लक्ष्य छ ।
Nabin Kumar Khatiwada
विगत डेढ दशकदेखि नेपालको समष्टिगत अर्थतन्त्र, मौद्रिक नीति, वित्तीय सुशासन तथा नीतिगत सुधारका क्षेत्रमा खोजी पत्रकारिता गर्दै।
लेखकका अन्य लेख तथा विश्लेषणहरू arrow_right_altप्रतिक्रियाहरू (२४)
कागजी घोषणा मात्र नहोस्, साना उद्यमी बैंकको ढोका धाउँदा कागजात नपुगेको बहानामा ऋण नपाउने पुरानै रोग दोहोरिनु हुँदैन। ५% ब्याज अनुदान कार्यान्वयन भए साँच्चिकै रोजगारी बढ्छ।
सटीक सुझाव बिदुरजी! राष्ट्र बैंकले यसपटक अनुगमनका लागि छुट्टै अनलाइन ड्यासबोर्ड बनाउने प्रतिबद्धता जनाएको छ।
कृषि प्रशोधन केन्द्रहरूले पनि यो सुविधा पाउने कुरा निकै सराहनीय छ। तराईका शीतभण्डार र तेल मिलहरूलाई तत्काल राहत आवश्यक थियो।
