किर्ने/नेपालको एक मात्र विद्युत गृह र विद्युतीकरण गरेको खिम्ती ग्रामीण विद्युत सहकारी संस्थाले १ मेगावाटको अर्को जलविद्युत आयोजना निर्माण गर्ने भएको छ ।
संस्थाको १३ औं साधारण सभाको अवसरमा अध्यक्ष शेयरबहादुर खड्काले ९९६ किलो वाटको झाँक्रे २ आयोजना निर्माण गर्ने जानकारी दिनुभयो ।
नयाँ आयोजना निर्माणका लागि झाँक्रे २ को डिपिआर पूरा भइ प्रक्रियाहरु धेरै अघि बढी सकेको उनले बताए । आयोजना निर्माण प्रक्रियाका लागि सर्भे लाइसेन्स प्राप्त भएको, जग्गा सम्झौता भएको, वातावरणीय संक्षिप्त अध्ययन स्वीकृत, निर्माण, उत्पादन र प्रशारण लाइसेन्स प्राप्त भएको र बैंकसँग एलओआइ प्राप्त भइसकेको उहाले बताउनुभयो ।
सहकारीले वैकल्पिक ऊर्जा प्रबद्र्धन केन्द्र अन्तर्गत नवीकरणीय ऊर्जा कार्यक्रमको ५० प्रतिशत अनुदान, तामाकोसी गाउँपालिकाको २ करोड ४० लाख र गोकुलगंगा गाउँपालिकाको २ करोड ४० लाख लगानीमा आयोजना निर्माण हुने छ । सो आयोजनामा सहकारीले ७ करोड १२ लाख ४४ हजार लगानी गर्ने छ । आयोजना सार्वजनिक निजी साझेदारी मोडेलमा निर्माण गर्ने तयारी छ । आयोजनाको लागत २६ करोड हुने अनुमान छ ।
नेपाल विद्युत प्राधिकरणसँग विद्युत खरिद सम्झौता (पीपीए) गरेर विद्युत आदन प्रदान गरेको छ । विद्युत प्राधिकरणले लघुजलविद्युत आयोजनाहरुसँग पनि पीपीए गर्न थालेपछि खिम्ती विद्युत सहकारीसँग रहेका २ पावर हाउसबाट उत्पादित विद्युत पनि इनर्जी नेटिङ प्रणालीमा सम्झौता भएको छ ।
दोलखाका र रामेछापका ५ स्थानीय तहको १४ वटा वडामा विद्युतीकरण गरेर सेवा पुर्याउँदै आएको सहकारीले प्राधिकरणसँग सम्झौता भएपछि आफ्नो बढी भएको विद्युत प्राधिकरणलाई बेच्ने र नपुग विद्युत प्राधिकरणसँग खरिद गर्न थालेको हो । उत्पादन बढी भएर खर्च नभएको विद्युत बिक्रीबाट सहकारीले आम्दानी गर्दै आएको छ ।
खिम्ती १ जलविद्युत आयोजनाको वातावरणीय प्रभाव मुल्याङ्कन गर्दा रामेछाप जिल्ला साविक बेताली, रस्नालु, र दोलखा जिल्ला ठुलोपातल, हावा, च्यामा, शहरे गरि ६ वटा गा.वि.स. प्रत्यक्ष प्रभावित र रामेछाप जिल्ला फुलासी, खिम्ती, फर्पु र नामाडी गरि ४ गा.वि.स.पकेट गा.वि.स. गरि १० वटा गा.वि.स. प्रभावित गा.वि.स. रहेको थियो । खिम्ती १ जलविद्युत आयोजनाले आफ्नो निर्माणका लागि बनाएको ६३० किलोवाट क्षमताको झाँक्रे लघुजलविद्युत आयोजना सहकारी मार्फत सञ्चालन हुने गरी प्रभावित गाविसका घरघरमा विद्युतीकरण गरेर हस्तान्तरण गरेको हो ।
प्रभावित गाविसमा विद्युत नपुग भएपछि १३ वर्ष अघि मात्र पुनः रामेछापको बेतालीमा ४ सय किलोवाटको हलुवा खोलामा समेत अर्को आयोजना बनाएर हस्तान्तरण गरेको हो । आयोजनाको सर्वे लाईसेन्स र निर्माण अनुमती पत्र लिंदाको अवस्थामा खिम्ती १ जलविद्युत आयोजनाले प्रभावित क्षेत्र भित्र २ हजार घरधुरीमा बिद्युत वितरण गर्ने भन्ने रहेको थियो ।
सहकारीले साविकका १० गाविस तथा हालका ५ स्थानीय तहका १४ वडाका ९ हजार ९ सय २३ ग्राहकलाई सेवा पुर्याउँदै आएको छ । जसमा घरायसी ग्राहक ७ हजार ४५ र उद्योग मिटर भएका ५ सय ९० उपभोक्ता छन् । सहकारीसँग ३३ केभी, ११ केभी, वितरण लाइन र आफ्नै ट्रान्सफरमरहरु रहेको सहकारीका कोषाध्यक्ष धिरज सुवेदीले जानकारी दिनुभयो ।
खिम्ती १ जलविद्युत आयोजनाले ६ सय ३० किलोवाटको झाँक्रे खोला र ४ सय किलोवाटको हलुवा खोला लघु जलविद्युत आयोजना निर्माण गरी सञ्चालनका लागि सहकारीलाई हस्तान्तरण गरेको हो । साधारण सभामा उपस्थित ऊर्जा राज्य मन्त्री पूर्णबहादुर तमाङले सहकारीले सेवा दिंदै आएको क्षेत्रमा विद्युत प्राधिकरणले व्यवस्थापन गर्ने र सरकार र स्टाटक्राप्ट बीच खिम्ती १ सञ्चालनको संयुक्त कम्पनी बनाउँदा हालका विद्युत गृह व्यवस्थापन सहकारीलाई दिन सकिने जानकारी दिए । उनले आउँदो चैतसम्म खिम्ती १ सञ्चालनका लागि संयुक्त कम्पनी बन्ने जानकारी दिनुभयो ।
साधारण सभामा बागमती प्रदेश सभा सदस्य आनन्द कुमार श्रेष्ठ,दोलखा र रामेछाप जिल्लाका राजनैतिक दलका नेताहरु,स्थानीय तहका प्रमुख प्रतिनिधिहरु लगायत सेयर सदस्यहरुको उपस्थिति रहेको छ । सहकारीले यसै वर्ष नयाँ सञ्चालक समिति चयनका लागि प्रक्रिया समेत अगाडी बढेको छ ।
