दोलखा÷मिलीजुली कालिञ्चोक बचत तथा ऋण सहकारी संस्थाले आफ्नो ३० औं कारोबार सुरुवातको अवसरमा सिंगटीमा रक्तदान कार्यक्रम गरेको छ । नेपाल रेडक्रस सोसाइटी र नेपाल रक्तदाता समाजसँगको समन्वयमा आयोजना गरेको रक्तदान कार्यक्रममा ४३ जनाले रक्तदान गरे ।
उपचारका क्रममा रगतका अभाव हुन नदिन नेपाल रेडक्रस सोसाइटी र रक्तसञ्चार केन्द्रले दोलखामा नियमित रक्तदान कार्यक्रम सञ्चालन गरेको छ । कुनै समयमा उपचारका क्रममा रगतको अभावका कारण विरामीको ज्यानै जाने अवस्था आएपछि १० वर्ष अघि जिल्लामै रक्तसञ्चार केन्द्र सञ्चालनमा आएको छ । रक्तसञ्चार केन्द्र सञ्चालन भएको तर रगत अभाव हुन थालेपछि वार्षिक कार्यतालिका नै बनाएर रक्तदान हुन थालेको हो ।
सहकारीका अध्यक्ष नारायणबहादुर श्रेष्ठले सहकारीले वार्षिक रुपमा रक्तदान र विभिन्न सामाजिक उत्तरदायित्वको काम गर्दै आएको जानकारी दिए । सोही अवसरमा फोहोर संकलनका लागि मन्दिरहरुका लागि डष्टविन वितरण गरियो । विभिन्न विधामा सम्मानित हुनेहरुको नाम पनि घोषणा गरेको छ ।
दुर्घटनामा परेका विरामी, प्रसुती र अप्रेसनका लागि रगत आवश्यकता पर्छ । रक्तदान कार्यक्रम पनि प्राविधिक व्यवस्थापन रेडक्रसले नै गर्दै आएको नेपाल रेडक्रस सोसाइटी दोलखा शाखाका सभापति गोकणर्प्रसाद पोखरेलले जानकारी दिए । विरामीलाई आवश्यक रगत विरामी वा विरामीका आफन्तले न्यूनतम् शुल्कमा खरिद गर्नु पर्ने व्यवस्था अहिले जिल्ला स्वास्थ्यले सोधभर्ना गर्न थालेपछि निशुल्क वितरण हुँदै आएको छ ।
जिल्ला प्रशासन कार्यालयले नै वार्षिक कार्यतालिका बनाएर कम्तिमा मासिक रुपमा एउटा संस्थालाई रक्तदानको कार्यक्रम बनाउने कार्यतालिकामा समावेश गरेको छ । तर आज भोली स्वतः स्फुर्त रुपमा रक्तदान गर्नेहरुको संख्या पनि बढ्दो अवस्थामा छन् ।
कर्मचारी, प्रहरी, सहकारी जस्ता विभिन्न संघ संस्थाले आफ्नो विषेश कार्यक्रम नै बनाएर रक्तदान गरी रगत संकलन गर्दै आएको छ । यस्तो रक्तदान कार्यक्रम महिनामा कम्तिमा एउटा नघट्ने गरी आयोजना हुने गरेको छ ।
नेफ्स्ुनका सञ्चालक सदस्य जिवसराज खड्काले सहकारीहरु नीति, विधि र प्रविधिमा रहेर काम गरे समस्या नआउने बताए । आर्थिक संकट बढ्दै गएको बेला तरलता व्यवस्थापनमा सहकारीहरुलाई आव्हान गरे ।
रक्तसञ्चार केन्द्र सञ्चालन नेपाल रेडक्रस सोसाइटी जिल्ला शाखाले गर्दै आएको छ । रक्तसञ्चार केन्द्रमा जम्मा भएको रगत चरिकोटको अस्पतालहरुमा उपचारमा आउने विरामीले उपभोग गर्छन् । १८ वर्ष उमेर पुगेका स्वस्थ व्यक्तिले ३ महिनाको फरकमा रक्तदान गर्न सक्छन् । कुनै पनि विरामीलाई रगत अभाव हुन नपारोस् भनेर विभिन्न समूह र प्रतिष्ठानले मासिक रुपमा रक्तदान कार्यक्रम आयोजना गर्ने गरेका छन् । तर कुनै दिवस अथवा कार्यक्रमको अवसरमा पनि यसरी रक्तदान कार्यक्रम आयोजना गरी रगत संकलन हुन्छ ।
रक्तदान जीवन दान भन्ने नारा छ । त्यसलाई आत्मसाथ गर्दै विशेष गरी सहकारी संस्था, राजनैतिक पार्टीका भातृ संगठन, सेना प्रहरी, कर्मचारी, क्लबहरुले आफ्ना उत्सव, पर्वमा रक्तदान कार्यक्रम आयोजना गर्ने गरेका छन् । रगत जम्मा गरी राख्दा कोही पनि रगतकै अभावमा अकालमा ज्यान जानबाट जोगाउन सकिन्छ ।
