केदार दहाल
दोलखा /दाेलखाकाे चरिकोटमा अहिलेसम्मकै सर्वाधिक राशीको प्रथम बागमती प्रदेश स्तरीय अन्तर पालिका सहिद रितबहादुर खड्का स्मृति भलिवल प्रतियोगिता हुने भएको छ ।
“स्वास्थ्य, पर्यटन र राष्ट्रका लागि खेलकुद” भन्ने मुल नाराका साथ युवा सञ्जाल दोलखाको आयोजनामा आगामी फागुन २१ गतेदेखि स्व. रित बहादुर खड्का स्मृति भलिवल प्रतियोगिता हुने भएको हो । खड्काको स्मृतिमा हुन लागेको प्रतियोगिताको प्रथम पुरस्कार २ लाख ५१ हजार, द्वितीय पुरस्कार १ लाख ५१ हजार र तृतीय पुरस्कार ५१ हजार तथा सान्त्वना पुरस्कार २१ हजार सहित ट्रफी, मेडल र प्रमाणपत्र रहेको युवा सञ्जाल दोलखाका अध्यक्ष पुष्कर अधिकारीले जानकारी दिनुभएकाे छ ।
याे वर्ष दाेलखामा निकै उत्साहका साथ भलिबल प्रतियोगिता कार्यक्रम हुँदै आएकोमा झन याे प्रतियोगिता सर्वाधिक राशीको भएकोले यस खेलमा धेरै समुहकाे सहभागिता रहने अनुमान गर्न सकिन्छ । जसमा बागमती प्रदेशभरका १३ वटै जिल्लाबाट खेलाडीहरु सहभागी हुन पाउनेछन् ।
यस खेलमा सहभागी जनाउनका लागि टिम दर्ता शुल्क रु १०,००० रहेकाे छ ।