दोलखा/नेकपा एमालेको तर्फबाट प्रतिनिधी सभा सदस्यको उम्मेद्वार बनेका दोलखाका बालकृष्ण शिवाकोटी लाभको पद रहेकाे भन्दै उम्मेदवारी खारेजीको माग गर्दै उजुरी परेको छ ।
नेपाल सरकारको सेवा सुविधा पाउने लाभको पदमा रहेर प्रतिनिधी सभाको निर्वाचनमा उम्मेद्वार भई प्रचार प्रसारमा समेत खटिएको भन्दै शिवाकोटी विरुद्ध मूख्य निर्वाचन अधिकृतको कार्यालय दोलखामा उजुरी परेको छ । उक्त उजुरीलाई कार्यालयले दर्ता समेत गरेको छ । उजुरीमा प्रतिनिधी सभा निर्वाचन ऐन, २०७४ मा भएको व्यवस्था विपरित शिवाकोटीको उम्मेद्वारी दर्ता गरिएको भन्दै उनको उम्मेद्वारी खारेज गरी आवश्यक कानूनी कारबाहीको माग गरिएको छ ।
नेकपा एमाले अध्यक्ष केपी शर्मा ओली प्रधानमन्त्री भएका बखत २०७३ साउनदेखि शिवाकोटी नीजि क्षेत्रको प्रतिनिधीका रुपमा लगानी बोर्डको सदस्यमा नियुक्ति गरिएको थियो । मंसिर ४ मा हुने निर्वाचनका लागि गत असोज २३ गते उम्मेद्वारी दर्ता भए पनि लगानी बोर्डको वेबसाईटमा अहिले पनि शिवाकोटीको नाम र तस्वीर सदस्यका रुपमा कायमै छ ।
प्रधानमन्त्री पदेन अध्यक्ष रहने बार्डमा अर्थमन्त्री, वन मन्त्री, ऊर्जामन्त्री, राष्ट्रिय आयाेगका उपाध्यक्ष, मुख्य सचिव र गभर्नर पदेन सदस्य हुन्छन् । अन्य सदसय भने प्रधानमन्त्रीले नियुक्त गर्ने कानुनी व्यवस्था छ ।
जबकी लाभको पदमा रहेको भन्दै निर्वाचन आयोगले नेपाल मेडिकल काउन्सिलका सदस्य डा. तोसिमा कार्की तथा सरकारी छात्रवृत्ति कोटामा अध्ययन गरेर आर्थिक लाभ लिएका रुपन्देही २ बाट उम्मेद्वारी दिएका हाम्रो नेपाल पार्टीका डा कमल भुषालको उम्मेद्वारी खारेज गरेको थियो । भलै कार्कीको उम्मेद्वारी भने खारेज नगर्न सर्वोच्च अदालतले अन्तरिम आदेश दिएको छ ।
निर्वाचन आयोगले त्यसरी लाभको पदमा बसेर कोही कसैले निर्वाचनमा उम्मेद्वारी दिएर प्रचारप्रसारमा लागेको थाहा भए जुनसुकै उजुरी दिन सकिने जनाएको छ । आयोगका प्रमुख आयुक्त दिनेश थपलियाले त्यसरी परेका उजुरी पुष्टि भएमा निर्वाचनको दिनसम्म पनि मनोनयन खारेज हुने जानकारी दिए ।
शिवाकोटी मेगा बैंक, कालिञ्चाेक दर्शन लिमिटेडकाे पनि सञ्चालक छन् । दुवै पब्लिक कम्पनी हुन् ।व्यापारिक पृष्ठभूमिका शिवाकोटी दोलखाबाट यसअघि मन्त्री समेत भईसकेका एमाले नेताहरु पार्वत गुरुङ र आनन्द प्रसाद पोखरललाई पछि पार्दै प्रतिनिधी सभा सदस्यको उम्मेद्वार बनेका हुन् । नाताले एमाले अध्यक्ष ओलीका भान्जा पर्ने शिवाकोटीले त्यसकै बलमा टिकट पाएको चर्चा एमाले वृत्तमा पनि हुने गरेको छ ।
